اليوم الأول من فبراير لعام 2011
عكفت على متابعة الأخبار من الـ BBC وغيرها من القنوات ( حيث أني لا أعيش في مصر..)
وسهرت حتى شاهدت معتز الدمرداش في برنامج 90 دقيقة وكيف أنه عندما فتح الاتصالات بعد خطاب الرئيس الذي قال فيه إنه لا ينتوي ترشيح نفسة مجدداً
( ليه يا عم الحج انت عايز لسه تحكم فينا لحد ما يبقى عندك 150 سنة !!! )
المهم كل الاتصالات جاءت من خارج مصر وداخلها وكلها بكاء و ولولة على الأب الكبير.. قائد الطلعة الجوية اللي عايز يموت في مصر ومش هيسيبها
( على أساس إن الناس اللي في مصر بتموت في إيطاليا!! )
وسامحنا يا ريس ونبوس رجليك وجزمتك وأن دي إهانة للرئيس وبصراحة دمي اتحرق وغلي!!!
أولا تكريس أن الرئيس هو أبو الشعب مشفتهاش غير في الدكتاتوريات اللي الرئيس أو الملك بيحكم مدى الحياة فطبعا ليه حق يكون أبونا وأمنا!!!!!!!!!!! وجدنا!!!
نفسي يا أستاذ معتز في رئيس يجي ويكون له كل الاحترام والتبجيل ..لكن..مش أبويا ولا يكون إله!!!!!! لأنه مش هيلحق يكون أب أو إله..كلها مدة أو اتنين ويمشي ويجي غيره بحماسة جديدة وأفكار جديدة ويكون تحت عين الشعب ولما يخرج يا سيدي من السلطة لو عمل خير نبوس ايديه ورجله...ولو غلط نحاسبه...هوا ده العدل...
وفضلت تتوالى الاتصالات لحد ما اتصلت الحاجة حنان من بشتيل وولولت وعيطت وقالت عن الشباب اللي في التحرير " الحقوا بيوتكم وامهاتكم وإخواتكم عشان الحرامية هيخشوا عليهم بدل ما انتو قاعدين كده "....وهي نفسها من كام يوم اتصلت تستغيث بمعتز الدمرداش وتقوله الحقني انا وبناتي الأربعة من البلطجية!!!...معرفشي إذا كان فعلا حد وصلها ولا لأه؟؟؟!!!!
والفنان أحمد بدير كمان اتصل وندد بالإهانة للرئيس وإنه رمز البلد!!!
بيتصل ناس كتير ويصدعونا بالطلعة الجوية...كأنه مفيش حد حارب غير مبارك ولا حد استشهد او أصيب !!!!
بيتصل ناس وبيقولوا الريس رجع طابا وعمل المترو وعمل وعمل وغيره
وأقولك يا استاذ معتز ...ما تستعبوطناش.........
الريس ........يعني قانون طواريء!!!
الريس.......يعني نبيع الغاز لإسرائيل...والناس مش عارفة تجيب أنبوبة البوتجاز!!!
الريس.......يعني يموت تلات عساكرعلى حدودنا مع اسرائيل وسكتم بكتم!!!
الريس.......يعني العبارة....
الريس.......يعني البطالة...
الريس.......يعني الفساد...
الريس.......يعني قيمة مصر اللي وقعت ولم يبق لها دور...
الريس.......يعني الشباب المعتقلين بالعشرات وبغير أي سبب...
الريس.......يعني الحكومات الزبالة اللي كانت بتتفلسف على اللي خلفونا وهما بهايم وبقر...
الريس.......يعني الأراضي اللي اتنهبت...
الريس.......يعني الحزب الواطي ابن الواطي ورموزه الواطيين اللي اختفوا في نص ساعة واتحرقت كل مقارهم...وكانوا بيطلعوا ضيوف عندك ويتنطعوا علينا بأن الأحزاب والحركات مالهاش تمثيل على الأرض!!!!!!!
الريس.......يعني نهر النيل اللي هيتنهب مننا!!!
وفي النهاية....بتكلموا على إهانة الرئيس والتنديد بيها!!! ولما تناقشوا وتروجوا في برامجكم إنه والله ده كان احمد عز وكان حبيب العدلي!!!
ده معناه يا استاذ معتز إنه كان طرطووووووووووووووووووووووووووور ما بيفهمش وما بيشفش وما يصلحشي يكون رئيس
هيا دي الإهانة الحقيقية!!!!!!!!!!!!
الرجاء ما تستخفوش بعقولنا وما تحاولوش تروجوا لإنه في ناس بتتحكم في الشباب ده
...الريس بدل ما كان يعمل مترو كان مفروض يعمل عشرين خط مترو ويربط السعودية بمصر بجسر
كان مفروض ينهض بالبحث العلمي
كان مفروض يعمل مشروع قومي للزراعة والاكتفاء الذاتي من القمح بدل ما يعين وزراء زراعة متخلفين عقليا
كان مفروض يستثمر القوة البشرية اللي عنده في مشاريع تنهض بالأمة
يا استاذ معتز اللي كان بيتحكم كان بيتحكم فيكم انتم والمتصلين اللي بيتصلوا يولولوا لمبارك وما عندهمش ذرة تفكير ولا رؤية ولا بصيرة...حسبي الله ونعم الوكيل...
ليست هناك تعليقات:
إرسال تعليق