اليوم هو الأول من فبراير 2011 وهو صبيحة الثورة المليونية التي يحتشد لها الشعب في مواجهة نظام الرئيس البائد الذي جثم على صدورنا طيلة 30 عاماً.. تمثل من عمري شخصياً كل عمري ما عدا خمس سنوات..نظام ظلم واستبد وطغى واعتقل ونهب وتواطأ مع إسرائيل وغيرها على حساب البلد والشعب وكرامته التي كانت يوما ما محط إعجاب الكثيرين وتقديرهم...
ركبت تاكسي من كام سنة مع سواق في ذلك البلد العربي الشقيق الذي أعمل فيه وقال لي من أين أنت فقلت له من مصر ( ساعتها كنت كاره البلد جدا جدا... غير انهارده )
وقلتله وانت منين يا عمي ( كان راجل كبير في السن ) ..قالي من اليمن..قلتله ناس اليمن طيبين
قالي عارف يبني كنا زمان بنشوف المصري على أيام عبدالناصر ( اللهم ارحمه..وأسكنه فسيح جناتك ) وكنا بنقول عليه ايه...قلتله ..بتقولو عليه ايه؟؟!!
قالي كنا بنقول عليه .."ناصر"..كان بيمشي وبنحس انه مرفوع القامة وله هيبة !!!
أي مصري كان بيكتسب قوة وقدرة قائده كمكتسب حقيقي وحتى لو ما كانشي فيه القدرات دي..
والله ما ببالغ لو قلتلكم إن في البلد اللي بعمل فيه الأيام دي وقبل الثورة كانوا بيقولو على المصري
ما معناه حلنجى..نصاب..وساعات غير مؤتمن!! من اللي بيشوفوه من الفساد اللي في بلدنا( وطبعا كل بلد فيها وعليها وكل البشر مش ملايكة ولا شياطين في المطلق )....لكن اللي اكتسبه الشعب خلال الـثلاثين سنة الماضية من فقر وذل ومهانة خلانا نبدو لغيرنا كده في حين يبدو اللبناني مثلاً في نفس البلد التي أعمل فيها كأنه وافد من أوروبا وله من الأجر والاحترام ما لا يبلغه المصري؟؟!! ليه يا ترى واكتسب ده منين؟؟
أكيد ده ميراث بلده وشعبه اللي بيكتسبه الفرد حتى ولو كان غير مؤهل...
أرجع لموضوعي ورسالتي الأساسية وهو تسليط الضوء على النجوم والأعلام من الذين شاركوا في بناء هذه الثورة المجيدة وهم أكيد الشباب.. واللي هكرر وأقول يا ريتني كنت معاهم انهارده في ميدان التحرير...وأضيف ليهم كل من وقف بجانبهم من جميع أطياف المجتمع من الأزهر والفنانين والقضاة والإعلاميين ( الشرفاء ) وقبلهم رجال الجيش ومعهم الكتاب ورجال السياسة الشرفاء وأحزاب المعارضة بأطيافها المختلفة...
وعايز كمان من خلال رسالتي ( اللي بسببها عملت المدونة دي ) أشاور على أبواق النظام اللي إن شاء الله هينكسر لا محالة...ألا وهم أبواق النظام وإعلامييه واللي إن شاء الله الناس هتلفظهم وهترميهم في مزبلة التاريخ...
منذ يومين بالتحديد كنت أتابع قناة الجزيرة بشغف ففي كل ثانية وكل لحظة تحدث مداخلة مهمة من شخص وطني أو كاتب أو عالم ( زويل وفاروق الباز ) لإرساء دعائم الحرية ودعم الثورة المباركة المؤيدة بيد الله عز وجل..
وفي نفس الوقت أسمع وأشاهد إعلام مصر المتخاذل اللي ليسه بيقول كله تمام والأمور تحت السيطرة وميدان التحرير فاضي ومفيش متظاهرين وكأننا بهايم لا ترى ولا تسمع ولا تفهم!!!!
ده أول جهاز من أجهزة الدولة مفروض يتعرض للمحاسبة ( أنس الفقي وغيره من اللي كانوا بيتصلوا ويقولو مبارك أبونا وأمنا والكلام الأهبل ده!!! )
قلت أشوف المحور ودريم ( 90 دقيقة و48 ساعة.....الطبعة الأولى ..الحقيقة...العاشرة مساءً )
48 ساعة....... من قبل يوم 25 يناير وسيد وهناء عمالين يقولوا يا جماعة الرسالة وصلت ( يعني خلاص روحوا بيوتكم يا شباب وريسنا الله يديله الصحة فهم ( الغبي ) وهيشوف مطالبكم!! )
ويأبى الغبي ابن الغبي إنه يطلع للناس ( عشان مفروض انه رئيس يعني ) الا بعد تلات ايام بعد اللي اتقتل يكون اتقتل وشبع موت والجيش ينزل والشرطة تنسحب ( انشقت الأرض وبلعتهم!!! )
وينتقل المشهد للخطة "ب"...البلطجية والسجون اللي اتفتحت على يد العرب!!! اللي جايين من غزة يحررورا سجنائهم !!!!!!!!!!!!! ....على اساس ان العرب الملثمين دول جم في نص ساعة ومعاهم سلاحهم جوا المحفظة بتاعتهم ومحدش شافهم !!!! وفتحوا السجون كلها وحرروا سجناءهم من كل سجون البلد وبالمرة طلعوا البلطجية معاهم ودولهم كمان سلاح السجون بعد ما استولو عليه!!
...قصص ابني الصغير ما يصدقهاش..لكن سيد وهناء وضيوفهم روجوا ليها بشكل غريب
وساعة ما قرب يتحرق المتحف المصري ..سيد قال ماهو في ناس بتقول اللي جوا المتحف دي "أوثان"....يقصد الإخوان المسلمين!!!!....لا حول ولا قوة إلا بالله...وفي نفس الحلقة واحد بيقوله الناس لسه بتتوافد لميدان التحرير..قال للضيف بدهشة .." هما لسه بيتوافدو "...يعني انت قاعد ومش عارف حاجة وعمال بتلقي بالتهم جزافا انت وهلال حميده..بدل ما تنزل تشارك مع الناس وتدافع عن الشباب اللي راح وبيضحي بحياته عشان ولادك يطلعوا في جو من الحرية !!
وهناء السمري اللي كل ما تسمع اسم حسني مبارك..تقول.." قائدنا ومرجعيتنا ورمانة الميزان..وفاضل بس انها تقول وصلى الله عليه وسلم!!! "
ولحد امبارح عمالين يثبطوا في ثورة الشباب وبيقولوا لـ " أسماء محفوظ " نهدى ونلتقط أنفاسنا ونشوف الإدارة هتعمل ايه...أرجوك يا سيد وأرجوكي يا هناء انا مش هستفيد لما أقول إن انتوا الاتنين خونة وكلاب النظام..لكن هستفيد لما ترجعوا لعقلكم وتقفوا جنب ولاد البلد لأن انتو لو فضلتو على كده هنتف عليكم..انتو وضيوفكم المرتزقة...الناس بالآلاف والملايين بيتظاهروا وانتو بتصادروا عقول كل الناس دي انتو وضيوفكم وكأننا لا نفهم ولا نعقل وانت وهناء وضيوفكم الغير شرفاء بس اللي بيعقلوا ويفهموا!!!...توبوا الى الله وارجعوا وإلا انت عارف يا سيد أول شخص هيتف عليك هم ولادك لما يقروا التاريخ!!!..الشهادة لله تتقال كنت بتقول كلمة حق ومعاها خمس كلمات لمبارك ودي مصر يا جماعة وما ينفعش كده..كل ما تتزنقوا تقولوا دي مصر...مش فاهم يعني ايه مصر في نظركم!!
90 دقيقة...معتز الدمرداش وضيوفه..كنت أحسن بكتير من سيد وهناء وكنت بتفضل يوم 26 تتكلم مع صلاح عيسى عن الأمن وإنه هوا ده اللي شاغلنا وعن دور الجيش ( وسكتم بكتم مفيش كلمه عن الشرطة ومؤامرتها!! ...غير مكالمة الحاجة حنان من بشتيل اللي قعدت تصوت وتقول البلطجية في الشوارع وبناتي الأربعة مين يحميهم ويا ريس اوعى تسيب البلد وسامح عيالك..ودول شوية عيال بناطيلهم ساقطة ولو طلعت عليهم اسرائيل هيجروا...( يا حجة اطمني ..طلع عليهم اللي أسوأ من اسرائيل ). أوشوية وصلاح عيسى هتفر الدمعة من عنيه وانت يا معتز أعدت المكالمة مرة تانية وقد ايه دي.. صرخة أم ...ومع افتراض ان اللي قالته حقيقي...هما الشباب اللي بناطيلهم ساقطة وراحوا ميدان التحرير يستقبلوا رصاص القناصة عشان يحرروا البلد هما البلطجية!!
ولا دي مؤامرة جهاز الشرطة الخاين اللي على راسه حبيب العدلي تحت أمر الريس اللي بتقولي عليه سامح عيالك وما تسيبشي البلد..يا حجة حنان انتي مش فاهمة حاجة في حاجة!!! واللي سمعك وماردش عليكي صح وبيضلل الناس ولا يسلط الضوء على المؤامرة الا في تاني يوم 27 ولا 28 مع محمد شردي اللي كان بيتكلم صح ساعة ما كنتم بتناقشوا... يا إما الأمن أو الثورة!!!!!!!!!!!
كلام فارغ ...الشباب بيموت ...وانت تقولي أمن...هيا الحاجة حنان دي معندهاش رجالة في عيلتها خالص!!!
وانت وصلاح عيسى قاعدين في الاستديو تستقبلوا استغاثات الناس مش خايف على بيتك من البلطجية اللي انتشروا في كل شبر في مصر في ظرف نص ساعة!! ما شفناهمش دخلوا عليك الاستديو مثلا!!!
في نفس الوقت.....
العاشرة مساءً:...تناقش استاذه منى الشاذلي الشريفة مع بلال فضل وعلاء الغطريف ..الشرفاء.. تلك المؤامرة التي حيكت من حبيب العدلي واعوانه ( أكيد في شرفاء في جهاز الشرطة )...لكن مفيش شريف بيختفي في وقت الشدة...
الطبعة الأولى ...الحقيقة..: الشرفاء يمتنعون...قال رسول الله صلى الله عليه وسلم من كان يؤمن بالله واليوم الآخر فليقل "خيراً أو ليصمت"......نفسي أسمع صوتك يا أستاذ أحمد المسلماني وانت بتبهدلهم زي ما كنت بتبهدل الوزراء في الماضي بس المرادي لا تستثني الرئيس....الرئيس اللي رجعنا للقرون الوسطى وقطع الانترنت وخدمة الرسائل وشوش على قناة الجزيرة ووقف حركة القطارات وقتل الشباب.... وسمح للعصابات بترويع المصريين...وخلى من شرف جهاز الشرطة ودوره خيانة !!!...ده اللي وقف من كام يوم وقال على نواب مجلس الشعب الشرفاء المعارضين .."خليهم يتسلوا"..
أرجوكم محدش يسكت...أنا مش بفرق بطاقات خائن أوشريف ..أنا بعرض حقائق ...حد يفهمني لو انا غلطان...يا انتو مجانين ومصدقين إنه الفارس زي ما حسن راتب صاحب المحور بيقول كده أو خايفين ولو كنتوا خايفين ..خلاص الحمد لله انتصرنا ومش هنخاف من حد تاني بعد كده...
أرجوكم كونوا مع الثورة وليس ضدها وسيبكم من الكلام الفاضيي بتاع مصر مستقرة مصر آمنة..ده استقرار بذل وأمن بمهانة....أنا عندي أموت ويعيش ابني كريم ..أحسن ما اعيش انا وهو في ذل ومهانة....
في واحد شريف عنده عقل يفرض حظر التجول ويعتبر نفسه حاكم البلاد العسكري...والدبابات مكتوب عليها يسقط مبارك!!!!!!!....أحه...أنا لو مكانه انتحر....
وأتمنى اسمع صوت أستاذ وائل الابراشي أيضاً ويكشف كل الحقائق وصوت عبدالحليم قنديل.
وفي النهاية أنا تاني بكرر حد يفهمني...يتصل رجال شرطة لقناة المحور بدون ذكر اسماءهم ويقولوا حبيب العدلي السبب وأمن الدولة اللي زور الانتخابات!!!
طيب ضميركم صحي دلوقتي!!!
وماله ومع ذلك انا راضي بس لازم كلنا نتوب دلوقتي وإحنا لسه في وش النار مش بعد ما يقع الصنم!!
